شوية اسئلة.......... رخمة رخامة

فيه أسئلة بديهية مالهاش اي لزمة في الدنيا
بنتعرّض ليها كل يوم من كل الناس

خلـونـــا نشــوف أمثلة

إنت في أوضتك .. على السرير وطافي النور ومتغطي
ييجي أخوك الظريف ويفتح الباب عليك ويقول
: ايه ده انت هتنام ولاّ ايه

أظن ده مش وضع الرقص !!! واضح ان انا هنام ))

***********

انتم معزومين عند ناس ورحتو لبيتهم وأول ما فتحولكوا الباب يقول
بنهم الصغير: انتوا جيتــواااااااااااااااا ؟
( لا لسه ))

***********

والعكس : انت لابس هدومك و متأنتك و على سنجة عشرة وريحة البارفان
واصله لاخر الشارع .. وخلاص بتفتح باب الشقة,, يجي حد من أهلك وينادي
بصوت عالي : انت خااااارج ولاّ اييييييييييه

(( !!! لاء دانا لسه راجع ))

***********

أو مثلا راكب العربية ودوّرتها وخلاص هتطلع ... يجيلك لك البواب
ويخبطلك على الزجاج,, انت بكل ذوق تفتح الزجاج
وتقوله : خير في حاجة؟
يقولك : انت رايح الشغل يابيه ؟

(( لا.. العربية واحشاني ))

***********

ماسك سماعة التلفون وقاعد تضغط الارقام يجي حد من أهلك ويقولك:
انت هتتكلم في التليفون ؟
(( لا.. بتفرّج عليه ))

***********

: ماسك مذكرة أو كتاب وقاعد تحفظ ومتحمس (أول مره بقى) .. جه حد
وقالك: هاه.. قاعد تذاكر ؟
(( تقوم رامي الكتاب و تقوله لااااااااء بتفرج على الصور))

***********
ربنا هاديك كده ... ماسك سبحة و عمال تسبّح ، يجي حد من البيت يعدي
عليك ويقول: هوّه انت بتسبح ؟

(( لاء.. هفرطها و
أسلقها ))

***********
ولاّ تعالــو شوفو قنواتنا واسئلتهم البديهية البايخة
برنامج اهداءات يتصل واحد يطلب أغنيه
ترد عليه ست الكوتكوته (المذيعة) بكل خفه ورشاقة : إنتا بتحب
لاغنيّة ديه ولا ايه ؟
(( لاء.. طالبها اخنق على نفسي ))

***********
أو مثلا في العيد
المذيع : هههههه هههههههه هههههه نتعرّف بيك
المواطن : فلان الفلاني
المذيع :هههههه هههههه هههههه بتقول ايه للأهل ههه و صحابك ههه
وقرابيك هههه و للناس اللي انت مخاصمهم كمان ؟ هههههه هههههه ههههههه
المواطن : أقولهم كل عام وأنتم بخير
((أكيد يعني مش هيقولهم البقاء لله
))
***********
المذيعة الظريفـة : وياترى بقى هتعملوا ايه العيد ده هتقضوه ازاي ؟
أكيد بيبقى زيارات الأهل و الصحاب و تخرجوا تشوفوا مظاهر العيد في
الشوارع و تفسحوا أولادكم ونتصل بالمعارف نعيّد عليهم و نقولهم كل
سنة و انتو طيبين
((سبتيله ايه يقوله يارخمة ؟ ))

***********
والأسخف بقى ... الشلل الكبير.. لما المذيعين يكلّموا الاطفال
يقول المذيع للطفل : إنت بتحب ماما وبابا ؟
(( يعني أساسي الواد لسه ما طلعلوش عرق الندالة علشان يقول لأ ))

***********
كفاية كده عليكواااااا
اظن انتوا عارفين الباقى

فعلا اسئلة مخنئقة
مشكور ع الموضوع الرائع ده

ايه يا مصطفى دة
انت جبت لينا سلسلة من الاسئلة البايخة ما وردتش على حد
بس بينى وبينك
هى وردت على كل واحد فينا

بسم الله الرحمن الرحيم
فعلا دى حاجات بتحصل فى كل مكان
واكيد كل واحد مننا بيقول حاجه من دول
ولو على فترات بعيده لكن فيه ناس
هى دى اساس حياتهم بس دول يبقو رخمين قوىىىىىىىى
شكرا لمجهودك موضوع جميل

متهيألي يامصطفى الأسئلة الخنيقة دى مافيش منها نسخة بالـ English
لو دوّرت حتلاقيها كلها نسخ عربية فقط..
وكويس انك لفتت نظرنا لها ..
عشان ناخد بالنا ومانسوقش في الرخامة ..هههههههههه

تحياتي وتقديرى لك ...

[ندعوك للتسجيل في المنتدى أو التعريف بنفسك لمعاينة هذه الصورة]

فعلا أسئلة رخمة و الواحد ساعات بيسألها بدون تفكير أنها فعلا مستفزة انا حسيت برخمتها لما عرضتها يا أستاذ مصطفى فى موضوعك
شكرا للتنبيه الواحد ياخد باله بعد كده

[ندعوك للتسجيل في المنتدى أو التعريف بنفسك لمعاينة هذه الصورة]