بنطلونك حصانك .. إن صنته صانك !!

بنطلونك حصانك .. إن صنته صانك !!
ـــــــــــــــــــــــــــــــــ

عندى صديق عزيز .. من أشيك شلتنا .. ملابسه من بيير كاردان ..و إيف سان لوران .. وأرمانى .. وكان دائما مثالا للرجل الشيك الأنيق .. وكان موديل خصوصى لنا .. نقلده فى ملابسه .. وأنواعها ( السينيه ).. والسينيه للعلم يعنى الماركات الأصلية .. مش التقليد !! فوجئت من كام يوم بصاحبنا ده لابس بنطلون جينز مقطع من أماكن كتيرة .. عند الركبة .. وعلى الأفخاد .. ورجل البنطلون .. ورقع فى كل حتة .. ومتخيطة بطريقة بدائية جدا .. وكأنها أتخيطت برجل حمار .. وحالته بؤس شديد ..
وحسيت بالحزن والغم والألم لهذا الصديق .. واللى قلب حالة بهذا الشكل المزرى .. وقلت فى نفسى يمكن خسر فلوسه فى البورصة .. وأنا عارف إنه من زباين البورصة .. أو يمكن مراته أجبرته على التوقيع بالبيع على كل ممتلكاته عن طريق البلطجية بتوعها اللى أسمهم بودى جاردز .. وأنا عارفها ست غلاوية ومفترية .. وممكن تعمل أى حاجة !! وبدأ يظهر على وشى هذا الشعور بالتعاطف والمؤازرة لدرجة البكاء .. ونويت أطلع من جيبى اللى فيه القسمة وأحطه فى جيبه المقطوع .. ولما حس صديقى بشعورى .. وفهم من نظراتى وعيونى الدامعة ما أخبئه فى نفسى من شفقة وعطف .. أيقظنى مما أنا فيه بمفاجأة من العيار الثقيل .. وقال لى أيه ياعم أنت مش عايش فى الدنيا ولا أيه ؟ دى آخر موضة فى العالم !! .. والبنطلون اللى أنت شايفه ده ( سينيه ) !! تانى .. سينيه يعنى أصلى .. وتابع ــ لا فض فوه ــ أن البنطلون السينيه المقطع .. المرقع ده ثمنه 600 جنيه !! وأنه أشتراه من أرقى محلات القاهرة الشهيرة بوكالتها لأرقى الأزياء العالمية ( السينيه ) .. وأنه لولا معرفته بصاحب المحل .. والعاملين به .. ومعرفتهم الشخصية له .. ماأستطاع الحصول على هذه التحفة الجميلة ..لأن الطلب عليه كتير جدا .. ولابد أن تحجز وتدفع عربون 50% يعنى 300 جنيه .. وتستلم بعد شهرين تلاتة !! يانهار أسود ومهبب !! بقى البنطلون الجربان المقطع المرقع ده بـ 600 جنيه وبالحجز كمان !! .. قلت فى نفسى خلاص تاهت ولقيناها .. والبلية حاتلعب ياواد .. أنا أنزل على سوق العتبة .. والموسكى ..وأشترى كل البنطلونات الجينز من البالة.. وأقطعها .. وأمرمطها فى التراب والطين .. وأمسح بها الجزم وبعد كده أضربها بنفس الجزم .. وأبعت لأهلنا اللى فى العراق .. وأفغانستان .. وفلسطين .. يبعتولى البنطلونات بتاعة الشهداء المضروبة بالرصاص أو حتى المدافع .. وأجمع شوية شباب من العاطلين الغلابة .. وأدى كل واحد فيهم إبرة وخيط .. ومش مهم الخيط لونه أيه!! .. أو الإبرة حجمها أيه !! .. أو حتى الشباب دول بيعرفوا يخيطوا ولا لأ !! .. وأطلب منهم ترقيع كل الخروم والقطع فى البنطلونات دى .. وبعد كده أحطهم فى أكياس شيك بألوان زاهيه .. وعلى فكرة سعر الكيس حايكون أكتر من سعر البنطلون !! وأوزعهم على بيوت الأزياء الراقية فقط .. وتخيلوا ببقى حاأجمع فلوس قدر أيه من اللعبة البسيطة دى ؟ ولو حد فيكم عايز ينفذها أنا ماعنديش أى مانع .. بس يشيل لى 20% عمولة علشان الفكرة ... وبعيدا بقى عن هذه ى الفكرة وأحلام الغنى السريع .. أنتبهت لحاجة إيجابية .. ومهمة جدا فى الحكاية دى .. وهى أن الموضة دى عملت اللى ماقدرتش الحكومات تعمله .. وهو المساواة بين الغنى والفقير .. فالأثنين لابسين زى بعض .. مقطع .. ومرقع .. ومش مهم بقى إذا كان البنطلون ده من مدينة نصر .. أو من منشية ناصر أو العمرانية أو العطارين .. بسعر 600 جنيه .. أو بـ 3 جنيه .. وهنا تدوب الطبقة الأرستقراطية بالطبقة الكادحة .. ومابقاش معروف الموضة .. من الفقر .. وتنصهر الطبقتان .. ونخرج بطبقة ثالثة منهما تشبه الطبقة إياها بتاعة الشباب اللى مربى شعره .. أو مركب حلق فى ودنه .. أو لابس قميص دانتيل .. ومعلق سلاسل فى رقبته .. وماتبقاش عارف ده ولد متأنث !! .. ولا بنت مسترجله !! .. وجرى العرف على أعتباره بين البينين .. وده نموزج حى وواقعى للعولمة .. لازم نقره ..ونعترف به ...
وتعاطفا مع الفقراء .. فإننى من هنا أنادى بيوت الأزياء العالمية بأستمرار هذه الموضة لأطول فترة ممكنة حتى يتمكن الفقير من الأستمتاع بنظرة الحسد من الناس .. اللى تمنى وحلم يشوفها فى عيون أى شخص لسنين طويلة .. وماطلهاش .. ولكن دلوقت حايشوفها ويحس بيها .. فأرجوكم خلوا الفقراء يستمتعوا بنظرة الحسد .. بدال مافيش حاجة تانية قادرين يستمتعوا بيها .
بقلـــــــم
صــلاح إدريــــــــس
* تم نشرها بعمودى الشهرى الجديد ( بصريح العبارة ) بالجريدة الجديدة أيضا (الأتجاه المعاكس ) عدد مارس 2010

الله الله الله

الله عليك تسلم اخى الغالى

ايديك وعنيك

شرفتنا ونورتنا استاذنا الرائع صلاح

واهلا وسهلا بك وسط اخوتك

بنطلونك حصانك .. إن صنته صانك !! Get-1210

هههههههههههههه

مقالة رائعة ومعبرة والله

وعلى فكرة شاهدت ذلك البنطلون

فى شرم الشيخ

بنطلونك حصانك .. إن صنته صانك !! Jeans2p2

بنطلونك حصانك .. إن صنته صانك !! Katie_holmes_ripped_jeans1

لبعض الشباب المصرى المتفرنج

هههههههههههه

وبيسموها روشنة

على خيبة ايه ماعرفشى

سيبك انت

دى لامؤاخذة قلة قيمة

يرحم زمان وليالى زمان

فعلا والله الايام دى بقت فى حجات مريبه
مرة وجدت فتاه بهذا المنظر
البنطلون متقطع من كل حته
هذا زمن البدع والتفاهات
وايضا كثر موضوع موضعه تسقيط البنطلون بين الشباب
بجد حاجه تقرف الواحد
اشكرك على هذه المقاله الرائعه التى تترق الى حال المجتمع

الله على جمال موضوعاتك يا استاذ صلاح

حقيقى شئ رائع جداً

وأجمل ما أعجبنى فى المقالة هو انتقالك من الموضة العمياء فى الملابس

الى السياسة والحالة الاقتصادية الصعبة التى يعيشها كثير من الفقراء فى بلدنا

ولولا الزكاة التى فرضها الله على كل مسلم

ما كنا رأينا رحمة فى هذة الدنيا

اما بخصوص هذا البنطلون فأنا رأيته بعينى فى أحد المحلات ويطلقون علية كلمة بالغة الانجليزية وهى

Dirty

ومعنى هذة الكلمة بالعربية "قذر"

وهو فعلا يباع بسعر مرتفع جدا

فهل يعقل ان نلبس بنطلون قذر

الله الله الله
بجد موضوع روعه
فعلا وللاسف الشديد ان معظم الشباب بينساق وراء التفاهات والتقليد الاعمى
وزي ما قال استاذ احمد ان انتقال حضرتك من الموضه العمياء والتقليد الى الحاله الاقتصاديه والسياسيه شيء رائع
شكرااااااااااا لحضرتك

أبو مودى
مستر ميمو
أحمد أبويد
رورا

أشكر لكم كريم مروركم .. وطيب كلامكم .. جعلنى الله عند حسن ظنكم دائما .. لقد شرفنى وأسعدنى تواجدكم الكريم .. دمتم لى ولأسركم الكريمة بكل خير وبركة .. وواصلوا لنتواصل .

طرقت موضوع غاية في الأهمية..لتدق به ناقوس الخطر
فهذه الأيام يتعرض شبابنا لحملات شرسة من التقليد الأعمي
لكل ماهو جديد أو كمايسمونه الموضة ..
مثل البنطلون الـ
Low wist
ووضع الشباب لايشاربات حريمي وترتر على بناطيلهم..
ولبس القميص البولو والديرتي..وقصات الشعر الغريبة
وغيرها كتير من التقاليع الغريبة ..
وليس الشباب فقط بل البنات أيضاً شملهن هذا الهَوَس

أين دور الأسرة ..أين القدوة الحسنة..أين دور الدعاة !!
مايحدث من تدني أخلاقي للشباب سببه كل هذا
مع ضعف الوازع الديني
وانتشار كم كبير من السفه في وسائل الاعلام المختلفة

أين دور الرقابة على المواد التي تقدم لشريحة الشباب
التي تعتبر بناة وعماد المستقبل في الوقت القريب

تركنا هذا البناء الذى كان يوما ما قوياً صلباً يلهث وراء الموضة
وينحدر أخلاقيا
ويصبح لين هش
فإلى أين بهذا الوضع المتدني لشبابنا سيقودنا الحال ...!!!

بنطلونك حصانك .. إن صنته صانك !! Lc057669

بنطلونك حصانك .. إن صنته صانك !! Lc057669

موضوعك جميل جدا أستاذى الغالي
صلاح ادريس

ومع انك قدمته لنا بأسلوب ساخر محبب لطيف مشوّق
ولكنه يحوى كثير من المعاني ..ويلمس واقع مؤلم حقاً
تدمي له القلوب..

تسلم لنا يارب
ويسلم لنا فكرك وقلمك

دمت لنا بكل الخير
وفي شوقٍ دائم لا ينتهي ..لكل مواضيعك الرائعة

بنطلونك حصانك .. إن صنته صانك !! 8zx57669

بنطلونك حصانك .. إن صنته صانك !! 8zx57669

منى كبارة .ز

أشكر لك كريم مرورك ودوام تواصلك .. وجميل كلماتك .. دمت لى ولأسرتك بخير .. وواصلى لنتواصل .