ياكسـووووووفــى !!!

بســــم الله الرحمـــــن الرحيــــــــم



ــــــــــــــــــــــــــــــــــــــــــــــــــ ــــــ



ياكســوووووووفى !!!



ــــــــــــــــــــــــــــــــــــــــــــــــــ ــــ



أسم الموضوع :- ياكســوووووفى !!!

أسم الكاتــــب :- صــلاح إريـــــــــــــس

رقم الموضوع :- ( 99 )
التاريــــــــخ :- الأثنين 29 نوفمبر 2010
التصنيـــــــــف :- ترفيهـــــــــــى





**************************




أهلى وناسى وأصدقائى الأعزاء ..




(( هذا المقال كنت قد نشرته فى بعض المنتديات منذ عام أو أكثر ... بعنـــــوان (رهيبة ) .. ولكن أثناء أختيارى للموضوعات التى أنشرها فى مدونتى ( بالبلدى الفصيح ).. ضحكت من قلبى حين أعدت قراءة المقال .. وقررت أن أرسم البسمة على شفاهكم أيضا .. وأضحك الله سنكم .. وأسعدكم وعائلاتكم دائما يارب .. ووجدت نفسى أعيد صياغته بطريقة أخرى .. مع الأحتفاظ بجوهر الموضوع .



******************************




النهاردة الصبح بأفتح بريدى الأليكترونى كالعادة لقيت رسالة من صديقة عزيزة لأول مرة تراسلنى عبر الأميل .. .. فأستغربت وفتحت الرسالة .. ولقيت فيها .. مافيها !! وقلت لنفسى لازم أقولكم حكاية الرسالة دى علشان تكون عظة وعبرة لكل منكم .. وتاخدوا بالكم من تصرفاتكم ..علشان ماتقعوش فى الموقف المحرج ده .. والحكاية ياأصدقائى وعلى لسان صديقتى تقول :



بعد الجواز قررت أضحى برغباتى وحبى للبقوليات علشان لما بأكلها بيحصل فضايح .. و لكن بعد كام شهر من الجواز وبالتحديد يوم عيد ميلادى ، كنت راجعة البيت ، وعربيتى أتعطلت فجأة .. ولأننا ساكنين بره المدن فأتصلت بجوزى وعرفّته إنى حاأتأخر شوية .. لأنى مضطرة أرجع ماشية على رجلى المسافة اللى فاضلة .. وفى طريق العودة دخلت نخاشيشى ريحة لوز ... لووووز .. بأبص على الريحة لقيت عربية فول .. وشوية شباب حواليها .. والريحة دخلت من مناخيرى على قلبى عدل !! .. وبصراحة ماقدرتش أقاوم .. قلت لنفسى يابت كليلك طبق صغير على السريع كده .. ومش حايلحق يعمل غازات ..وحتى لو عمل غازات ، لسه المشوار طويل وأقدر أخرج كل الغازات فى السكة قبل ماأوصل البيت ..لكن لقيت نفسى لسه جعانة ...والفول لووز بأقولكم لوووز .. رحت ضاربة طبق تانى .. وتالت .. مع كام فحل بصل ..وقرنين فلفل مولع نار .. ومعاهم 4 أرغفة عيش ملدن .. ولما وصلت البيت لقيت جوزى واقف بره الباب مستنيينى بسعادة وبقه مفشوخ ع الآخر ..



وقاللى " حبيبتي ، أنا عامل لك مفاجأة على لعشاء الليلة " ।



وغطي عيني بقطعة قماش ، وقاللى أوعى تشيليها علشان المفاجأة ودخلني غرفة السفرة وأقعدنى على الكرسي ، ولما جه يشيل القماشة من على عينى التليفون رن .. فحلفنى ميت يمين ماأشيلش القماشة لغاية مايرد على التليفون .. فوعدته بذلك .. وهنا بقى لقيت الفول أشتغل فى معدتى .. والغازات بتلعب جواها ولا العجلة الدوارة بتاعة الملاهى !!.. رميت ودنى ناحية جوزى لقيته مشغول بالمكالمة .. قلت لنفسى فرصة يابت .. ورفعت رجلى اليمين ورحت مطلعة واحدة خبيثة من غير صوت .. بس ريحتها ( أسم الله على مقامكم ) زى عربية نقل مليانة سباخ لسه طازة .. فاأضطريت أمسك ديل فستانى الواسع وأهوى بقوة يمين وشمال علشان الريحة تروح قبل مايخلص جوزى المكالمة .. لكن تقولوا أيه بقى على قليل البخت !! .. لقيت بطنى لسه بتتعارك مع بعضها .. قلت أطلع واحدة تانية ..ووراها تالتة .. ورابعة .. وديل فستانى شغال مر وحة من فوق راسى يمين وشمال .. لكن المكان ( بعيد عنكم ) ريحته بقت زى ماتكون فتحت قبر جماعى لشوية كلاب بقالها شهر ميته !! وأنا شغالة تهوية بالفستان .. وكان بيتهيألى أقلعه خالص وأهوى بيه ..



وبعد شوية جوزى خلص تليفونه ورجع .. لقانى راسمة أبتسامة جميلة على شفايفى .. وبراءة الأطفال فى عينيه ولا كأنى عملت حاجة !! وشال جوزى القماشة من على عينى علشان أشوف المفاجأة ... وياريتنى ماشفت ... ياريتنى ماشفت !! أتفاجئت بوجود 12 شخص من أصدقاؤنا وزملائى ورؤساء جوزى بالعمل حوالين السفرة بيصقفوا وبيقولولى "عيد ميلاد سعيد" ..... ياكسوووووووفى !!!!!!!!!!!



بقلــــــم



صــلاح إدريـــــس



مدونتى ( بالبلدى الفصيح )



زيارتكم .. تسعدنى .. وتشرفنى ..



http://plackprince.blogspot.com/2010/07/blog-post.html