حذر ....... هزر

زمان كانت الفزورة بتشغل مخك وبتدور على حلولها بطرق مختلفة ولكن الفزورة
الأن دائما ماتكون حلولها كوميدية فأجابة السؤال غالبا ماتكون ضاحكة واليوم
أطرح نوع أخر من الأسئلة بمجرد ذكر السؤال لا نحتاج الى الاجابة مطلقا لكى
نستعين بأفيه المونولوجيست حمادة سلطان
تان تارالان تان تان .


*من هو صاحب فكرة تأجيل الدورى علشان يلعب المباريات المؤجلة
*من
هو الاتحاد الكروى الأفريقى والذى حين يستعد لمباريات أفريقية رسمية يلعب
مع دول عربيه فى الخارج "بعلب أو دول اوروبية فى الخارج"
"ويتصارع أعضائه على رئاسة البعثات " ولما يحب يلعب مع دول أفريقية "من غير علب" يلاعبها ولامؤاخذة فى الداخل "
*من هو مدرب المنتخب اللى فاته شهر من عمر الدورى وأختار اللاعبين على قديمه ونسى يختار على جديدو
*ما
اسم المدرب واللى لما كان مدرب حالى اطلق عليه مستمر حصريا "exclusive"
وصعب جدا أنك تعمل معه تمن حوار أو ربع كبده ’ ولما أصبح سابقا بعدها بيوم
بقى مشاع لدرجة مداخلات شغال ’ لقاءات شغال ’ حوارات شغال ’ تحليل مباريات
فريقه السابق والله العظيم شغال
*من هو الشخص اللى لما تفتح
التلفزيون تلاقيه تقعد تتفرج على جمال تسريحته وحلاوة صوته ولاكن بعد
الفاصل وبعدين تزهق من الفاصل وتنزل تروح لصحابك تلاقيه لسة شغال وبعدين
تروحوا تتعشوا برة وترجع بيتك وش الصبح تلاقيه برضه شغال ولما تصحى الصبح
قبل ماتروح الشغل وانت بتشرب الشاى باللبن تلاقى أعادته شغاله وبعدين تروح
الشغل وتنجح كالعادة أن تزوغ منه وترجع على البيت علشان تكمل نومك تلاقيه
برضه شغال ولما تصحى من النوم وتلاقى الماتش هتلاقيه هو اللى بيعلق ولما
يخلص الماتش هتلاقيه هو برضه اللى بيحلل وبعدين يخلص التحليل تلاقيه هو
اللى بيقرأ الصحف بتاعة بكرة ولما تقلب على محطة أخرى هتلاقيه هو اللى
بيعمل أعلانات البلاى ستيشن ولما تحب تجيب روتانا سينما هتلاقيه هو اللى
بيذيع ماتشات مرجان أحمد مرجان لدرجة أن كل يوم أسمع له حوالى خمس أسماء
جديدة منها شللو لولو ’ شوسته ’ شبوشكاش ’ شوكة ’ شبله
ولتسهيل الحزورة هذا الشخص معبود الجماهير لدرجة أنه يستقبل على لاب توبه حوالى 780 الف رسالة فى الصفيحة.
*من
صاحب فكرة تعديل قائمة الثلاثين لتصبح قائمة الـ 25 الحالية لأعطاء الفرصة
للاعبين الصغار ومنع تخزين تكدس اللاعبين فى الأندية وهو أيضا صاحب فكرة
الغاء قائمة الـ 25 وأعادة قائمة الثلاثين علشان اللاعبين سقعانة ومحتاجة
شوية تخزين وتكدس تانى.
*ماهو أسم الأتحاد اللى قبل مايسافر دولة عربية
بيأخذ تحذير من باباه وهو لو عملته أى شقاوة أو أخذته أى حاجة من اى أمير
أو غفير هتتعاقبوا ومش هنزلكوا الشارع على الأقل اربع سبع ايام أما
بالنسبة للعلب اللى انتوا أخذتوها تسلموها فى خلال أسبوع حسب ماتنص عليه
اللائحة ولكن معها رغيف علشان تحلفوا عليه أن مافيش حاجة أتكمرت من العلبة .
*من
هو مجلس أدارة النادى العريق والذى نجح بكل جدارة فى أن يجعل أسم ورمز
النادى مجال للسخرية فى المنتديات والفضائيات والكافيهات من خلال حملة
التبرعات المبنية على الخصومات على سبيل الذكر
أتبرع ولو بجنيه علشان نجيب صبغة لأبوكونيه.
*من
هو المنظم لمسابقة كأس " انت وحظك" أقصد كأس مصر واللى عمل دور الـ 32 على
ثلاث مراحل يوم 3 ماتشات وتانى يوم 5 ماتشات واليوم الثالث ماتشين ....
الله لسة باقى ست ماتشات طيب نعمل 3 ماتشات بعد 20 يوم وماتشين بعد 21 يوم
والماتش الأخير الا وهو الأهلى وكيما أسوان تعمله على رأى الفنانة شادية فى
فيلم معبودة الجماهير لما سألوها والفرح أمتى ياست سهير ردت مثلها مثل
الشخص الذى ينظم كأس أنت وحظك ... لما يخلص فستان الفرح
*ماهى القناة اللى نقترح أن نعدل من رمزها من مصرية مية فى المية الى شلبية مية فى المية
وفى النهاية لايبقى الا سؤال اخير
من هو الشخص الذى يفعل نفس الشئ عدة مرات ويتوقع نتيجة مختلفة فى كل مرة