هجرة الحمير

[center]

تم نشرها بعمودى الأسبوعى ( بالبلدى الفصيح ) ..فى عدد السبت 25 إبريل 2009 ..
******************

هجرة الحمير . ـــــــــــــــــــــــــــــــ قرائى الأعزاء ... أنتم طبعا عارفين الود والمحبة والصحبة الطيبة اللى بينى وبين الحمير .. وقد سعدوا بكتابتى عنهم مقالتين من قبل .. وهاهى المقالة الثالثة ... فقد أسعدنى خبر منشور بالجرائد المصرية بيقول :
	إن اليابان تقدمت بعرض رائع للحكومة المصرية .. ألا وهو شراء مليون حمار مصرى .. لأن شركة دواء يابانية أكتشفت أن حمير مصر .. من أفضل حمير العالم .. وجلدها غنى جدا جدا بمواد وتركيبات يتم إستخدامها فى إنتاج وتركيب أنواع عديدة من الأدوية.. ماتعرفوش الحكاية دى فرحتنى قد أيه !! أولا لأن علاقتى بالحمير علاقة وطيدة وجيدة جدا كما تعلمون .. وأنا دائم الإعجاب والأنبهار بهم .. وتقدير دورهم الحيوى فى عالمنا العربى .. وثانيا إن العرض اليابانى أعاد الأعتبار لأى حاجة مصرية .. حتى لو كانت الحمير .. والظاهر إن الحمير هم كمان قرروا الهجرة من مصر .. ولكن بطريقة محترمة .. مش زى الشباب اللى بيهربوا من مصر إلى أوروبا عن طريق البحر بطرق غير شرعية .. بتنتهى غالبا بهروبهم من الحياة كلها... لكن الحمير قررت الهجرة بطريقة رسمية .. وتقريبا دبلوماسية عبر إتفاقات وبروتوكولات ..ودخولهم من الباب وليس من الشباك ... صحيح إن نهاية البيعة دى هو السلخ... لكن على الأقل حاتضمن إن السلخ حايعود بفايدة على البشرية .. مش بعد السلخ حاتتباع اللحم لفقراء العرب .. اللى عايزين أى حاجة يمضغوها غير العيش والفول .. المهم آهى حاجة مسلوقة أو مشوية .. وبتتمضغ .. وخلاص !!! . أحضرت الآلة الحاسبة بتاعتى .. علشان أظبط الحسبة .. لقيت إن سعر الحمار الواحد والمعلن هو من 400-600 دولار ... ولو ضربناهم فى المليون حمار حايكون المتوسط 500 مليون دولار يعنى أكتر من 2.5 مليار جنيه مصرى حايدخل الخزانة المصرية ...ده طبعا إذا لم يحاول رجال الأعمال من ( نهازى الفرص ) النط على الصفقة ويحاولوا يبوظوها .. ويبحثوا لها عن عوامل تفشلها ... ويطالبوا أنها تكون زى إتفاقية الكويز مع إسرائيل .. يعنى نبيع الحمير زى مابنبيع الغاز المصرى بسعر رخيص .. والحجة الجاهزة هى العلاقات الأستراتيجية بيننا وبين اليابان .. وتشجيعا للتبادل التجارى بيننا وبين اليابان .. وإن اليابان حاتعيد لنا هذه الحمير بعد تدويرها .. بشكل عصرى كروبوت حميرية راقية بالريموت كنترول ... أو تدويره من حمار إلى حميّير صغير .. صوته هادى وناعم .. ولا ينهق بإزعاج .. وماياخدش مساحة كبيرة .. وممكن تطبقه وتحطه فى جيبك !! ولما تريد أستخدامه ماعليك سوى الضغط على الريموت كونترول .. فيرجع حمار عادى جدا بكامل هيئته ... ثم أنه لن يكلفك شيئا فى أكله وشربه وإقامته ..ولا تلويث للشوارع والبيئة ... بإختصار ستجد نفس الحجج والبراهين اللى قالوا لنا عليها لما تفضلوا وتكرموا علينا بإتفاقية الكويز بيننا وبين إسرائيل !! .. حول المنسوجات المصرية .. وكانت النتيجة زى ماالكل عارف دلوقت خسارة لعدد كبير من شركات الصناعات النسيجية .. ( العامة والخاصة ) والدليل إضرابات عمال النسيج المستمرة .. وإغلاق العديد من المصانع أبوابها ... وحياة أبوكم .. وأمكم ياأخوانا .. شيلوا أيديكم من على الحمير .. وخلونا نقول آهو فيه حاجة نفعنا فيها وجابت نتيجة وأرباح .. مش خساير كالعادة .. الله يرحم كاتبنا الكبير توفيق الحكيم .. فهو واحد ممن بجلوا الحمير وقدروها .. وألصق أسمه بالحمار فى كتابه ( حمار الحكيم ) .. وكان له حكايات وأحاديبث بينه وبين حماره .. وأخيرا خرج علينا المطرب الشعبى الحميرى ( سعد الصغير ) بأغنية بأحبك ياحمار !! وكل ده تأكيدا لمكانة الحمار ومنزلته الرفيعة .. ومافيش حد حايلوم حمير مصر إذا تمت الصفقة .. على أمل أن حياة يوما واحدا فى بلاد اليابان الحضارية النظيفة ... أفضل مليون مرة من قرن كامل فى بلادنا وقرانا العربية .. فالأكيد أن الحمير مش حاتلاقى حد يعايرها بحميريتها ( مع أنها ميزة .. مش عيب ) أو يمنعوا عنهم وجبة البرسيم ..فى الوقت اللى بيعاير فيه الحكام شعوبهم بأنهم صرفوا كذا مليار على البنية التحتية ... وكذا مليار على الطرق .. وأن حكومته تدعم رغيف العيش بمليارات أخرى ... وعلى الأقل مافيش حد حايقول للحمار بأنه لايفهم فى الديمقراطية .. أو أن آداب النهيق تجبره على عدم النهيق فى حضور رئيس أو حاكم أو حتى زائر أجنبى وجهه أحمر .. وحكاية الحمار العربى .. هى بالضبط حكاية المواطن العربى .. لاقيمة له فى بلده ... وأنا سعيد إن الحمير عرفت طريقها أخيرا .. وعلى الأقل حايستخرجوا منها أدوية وعقاقير حاتفيد الناس .. بدل مايرموا لحمها للكلاب ... وفى بلاد عربية كتيرة بيعملوها كباب وكفتة .. وريحتها على الشواية تشدك .. وتشرح قلبك . مرة تانية بأحسد الحمير .. وأقولهم يابختكم .. ياسعدكم .. ياهناكم ياأصدقائى الكرام !! هاأنتم فى قلب آسيا النابض .. وتتعاملون مع شعب راقى وكريم .. حتى لو كانت إقامتكم معهم يوما واحدا ... وياريتكم تتوسطوا لنا عند اليابانيين علشان يحللوا جلودنا .. وأمعائنا .. يمكن يكون فيها أى مواد مفيدة .. تعطينا فرصة نعيش معاكم هناك .. ولو حتى ليلة واحدة .. بدلا من حياة كاملة عايشينها .. ونحن ندعوا ليلا ونهارا .. لإنهائها فى أسرع وقت .. بعد أن طفح بنا الكيل من كل ناحية ..وأنعدمت كل الآمال فى أى تحسن ..ولو طفيف !! بقلـــــــــــــــم صـــــلاح إدريــــــــــــــــس

[/center]

اكيد طبعا كلنا بنحب الحمار
المكافح الى بيتعب طول النهار فى الغيط
ويرجع اخر النهار مهدود الحيل
مقاله رائعه

مستر ميمو ..

عارف ليه كلنا بنحب الحمار .. لأن الغلابة المظلومين الكادحين دايما يصعبوا على بعض .. ويتعاطفوا مع بعض .. شكرا لكريم مرورك ياصديقى العزيز .. دمت لى .. ودامت مشاركاتك .. وواصل لنتواصل .

المشكلة بعد هجرة الحمير
سعد الصغير حيغني لمين

( بحبك ياحمار )
وقال احنا كنا بنضحك من كلمات الأغنية
ده طلع عنده بقى بعد نظر...

أكيد بعد موضوع الهجرة ده ..
حيعيد التفكير ..ويعمل تعديل
ويغني
( مشتاقلك ياحمار )..
وبدل ماكنا بنضحك من الكلمات
حنبكي من الألم والوجع..

تسلم أستاذى العزيز
ويسلم قلمك الذهبي...

لك خالص تحياتي وتقديرى ..
وفي شوقٍ لكل جديد تخطه يدك

هجرة الحمير ZLl69900

منى كبارة ..

عارفة مسرحية ( شاهد ماشافش حاجة ) لما عادل إمام كان بيحكى لحبيبته عن حكاياته مع المدرس .. وحوار أنتهى مع المدرس بأن قال له ( كلنا حمير ربنا ) .. وأنا بأقولك آهو يامنى ..كلنا حمير ربنا .. بشكل أو بآخر .. شكرا لمرورك الكريم ياصديقتى الغالية .. دمت لى ولأسرتك بخير .. وواصلى لنتواصل .