فـــــوازيــــر غــــــادة

بعد اختفاء فوازير نيللى وشريهان وفطوطه بمناسبة اكتساح غادة عبد الرازق

شاشات التلفزيون والفضائيات طرأ إلى فكرة فوازير غادة عبد الرازق ولكن بشكل

جديد ألا وهو اى اختيار سيكون صحيح يعنى الكل كسبان كسبان

وليكن اسم الفوازير " زهره وأسئلتها العشرة " .

1- فى ازمة جدو وبعد قرار اتحاد الكرة المطاطى
الاهلى خد جدو والاتحاد السكندرى خد فلوس + 2 لاعبين من الاهلى , جدو خد فلوس من الاهلى , اتحاد الكرة خد فلوس من جدو
طيب الزمالك خد إيه ؟
( صابونه – بمبه – موزه لانى مقدرش اقول خيارة ) .
2- فى كأس العالم 2010 جنوب افريقيا
الاول خد 24 مليون دولار والثانى خد 16 مليون دولار والثالث خد 12 مليون دولار وبقية المنتخبات خدت من 11 مليون دولار الى الحد الأدنى 8 مليون دولار
طيب مصر خدت ايه ؟
( نقطه – احترام بقية العالم الغير متابع لكأس العالم –مركز اعلى فى التصنيف العالمى لان مصر مخسرتش ولا ماتش لانها مشاركتش من الاصل ).
3- فى بطولة انجولا 2010 مصر خدت الكأس , اللاعبين خدو فلوس , اعضاء اتحاد الكرة خدو أوسمه جمهورية
طيب الأندية الغلابة " أعضاء الجمعية العمومية " خدت ايه ؟ ( سخرية – إهمال – 2 كيلو مشمش )

4- فى دورى النصف مليار
اللاعبين خدو معظم الفلوس , السماسرة خدو اللى أتفضل والباقى سلموه للى بيخلص , المدربين خدو شغل تانى بعد الظهر فى الفضائيات علشان التحليل والذى منه
طيب الجمهور الغلبان خد ايه ؟
( تنفيس الكبت عن طريق إخراج جميع أنواع الشتيمة العامة – الضرب المبرح وبعدين يروح – الضرب البسيط وبعدين السجن اللذيذ ) .
5- بعد إصرار الكابتن مجدى عبد الغنى عضو مجلس ادارة اتحاد الكرة على عدم ترك رئاسة لجنة شئون اللاعبين رغم قرار الجمعية العمومية بعدم رئاسة لجان الاتحاد من قبل أعضاء مجلس الإدارة الحالى ماذا تتوقع ؟
( ترك أعضاء الجمعية العمومية الجمعية العمومية – ترك الكابتن مجدى اتحاد الكرة وبصحبته لجنة شئون اللاعبين تطبيقا لمقولته محدش يقدر يمشينى من اللجنة – استقالة الدكتور وليد دعبس من قنوات مودرن استحراصا وتخوفا من عدم قدرته مستقبلا فى جعل الكابتن مجدى يترك مودرن ) .
6- بعد تغليظ العقوبات من قبل لجنة المسابقات فى اتحاد الكرة من المؤكد ان الطرف الوحيد المستفيد هو خزينة الاتحاد والطرف الوحيد الخاسر هو خزينة الأندية فماذا نقترح لعقاب الجماهير عند ارتكاب مخالفة ؟
(يقف وشه للمدرجات رافع ايدية الاتنين بين الشوطين – يحرم من الأكل والشرب تلت ماتشات – تحديد مكان الشغب فى الاستاد وتغريم كل مشاغب 5 جنية عند خروجه )
7- بعد عودة الكابتن سمير زاهر الغير متوقعة الى
بيته " اتحاد الكرة " ماذا تتوقع ان يكون رد فعل المنافقين ؟
( اقناع الكابتن سمير بان ولائهم لهانى ابو ريده كان نوع من الغصب والمحافظة على أكل عيشهم لتربية ولادهم سوسن وفرج – إقناع الكابتن سمير ان التقرب من صاحب الكرسي لا يعيبهم مادام كل اللى حصل فى الشهر اللى فات سوف ينقلونه إليه بالحرف ومعاه شوية بهارات – اقناع الكابتن سمير ان اللى فات على رأي عادل امام فى فيلمه على باب الوزير كان ..... اختبار مع الشربة ) .
8- ما سبب عودة المحترفين المصريين من أوروبا والدول العربية
( وحشتهم ست الحبايب يا حنانا نانا – مش عارفين يتأقلموا علشان ثقافتهم تايلاندى – مش واخدين على الصحيان بدرى والخصومات الحقيقية مش البلاستيك ) .
9- مجلس ادارة اتحاد الكرة يقرر منع المدريبن والاداريين من العمل فى الفضائيات
( لمنع الازدواجية – التخلص المهذب منهم لأنهم بالطبع هيسيبو الاتحاد مش هيسيبو الفضائيات – لإزاحتهم من الفضائيات تاركين الفرصة كاملة لأعضاء مجلس الإدارة ومدحت شلبى ) .
10- بعد قرار الرئيس مبارك بحظر بيع أراضى الدولة
رجال الأعمال خدو معظم الاراضى , الحكومة خدت رضى رجال الأعمال , الدولة خدت شوية ملايين طيب الشعب خد اية ؟
( حق الانتفاع مستقبلا – مصمصة الايدين والشفايف – حسرة على اللى فات ).

بقلم الدكتور عمرو عبد الحق